Magsuon gipamusil sa holdaper

CEBU, Philippines - Patay ang usa ka lalaki ug kritikal ang kahimtang sa manghod niini human sila gipamusil sa mga mi-holdup pasado alas-4 sa buntag kagahapon sa may Arlington Pond sa eskina sa Lim Tian Tend Street sa barangay Sta. Cruz ning dakbayan.

Ang managsuon giilang sila si Herbert Bagnol Cursiga,21, ug Vedasto Bagnol Cursiga, 25, nagpuyo sa Junquera Extention sa barangay Sta. Cruz ug pulos mga trabahante sa Suria Korean Restaurant.

Tulo ka wala mailhing mga lalaking gibana-banang 5’5 ang height ug ang usa nga 5’6 ang height nga nagsuot og silver necklace ug orange nga t-shirt, ug ang ikatulo gibana-banang 5’3 ang height nagsuot og puti nga t-shirt ug maong nga short pants.

Ang mga biktima nagbaklay niadtong tungura dihang kalit lang nga giduol sa tulo nga giingong nagbarog nang daan diha sa ilang agianan sa nahisgutang dapit ug kalit lang usa sa tulo ang mibunot og armas ug midiretso og deklarar og holdup sa managsuon.

Gikatahong ang naggunit sa armas midiretso og kuha sa cellphone sa namatay ug   pitaka sa bulsa sa manghod dayon gipasa sa duha niini ka kaubang maoy nagsilbing backups.

Human niini mipabuto ang naggunit sa armas tumong sa mga biktima apan wala kini dayon makaigo hinungdan misuway og sukol si Vedasto ug giilog ang armas apan sa ilang panag-ilogay mipaka ang duha ka buto sa armas ug naigo ang managsuon.

Si Vedasto naigo sa walang bahin sa dughan samtang ang manghod niini naigo diha sa walang paa.

Ang duha gidala sa Cebu Velez General Hospital apan namatay si Vedasto human sa pipila ka oras nga pag-atiman.

Samtang ang tulo ka wala mailhing tulisan daling nakadagan human sa panghitabo paingon sa Osmeña Blvd. area ug misakay og taxi paingon sa downtown area. Matud pa ni Cebu City Police Office Director Patrocinio Comendador sa pakighinabi sa mga tigbalita nga ila pa karun nga subayon kun si kinsa ang maong mga tulisan.

Apan dugang pa ni Comendador nga aduna silay mga pagduda nga molupyo ra kini sa Sambag 2 o sa B. Rodriguez tungod kay diha sa maong dapit ang direksyon sa ilang pag-ikyas.

Gihulagway usab ni Comendador nga dili mga bigtime nga tulisan ang mibiktima sa magsuon. – BANAT NEWS