1 patay sa away sa disko

CEBU, Philippines - Usa ang patay ug usa angol sa duha ka mga batan-ong nag-away ug nagdinunggabay sulod sa diskohan sa barangay West Poblacion lungsod sa Naga niadtong Domingo sa alas 12:30 sa kaadlawon. Ang biktima mao si Denola Joebert Alfornon, molupyo sa Tangke-2 sa Naga samtang ang suspek mao si Ronald Candilosa, 18, nagpuyo usab sa sitio Luym barangay West Poblacion sakop sa maong lungsod. Matud ni PO2 Ken Cabrera sa Naga Police dihang nahinabi sa Banat News dunay gipahigayung disco niadtong tungura nunot sa gipahigayong kapistahan. Wala pa matino sa kapolisan kung si kinsa ang mimugna sa kagubot apan may mitumaw nga komosyon ug ilaha nalang nahibaw-an nga nagdinunggabay ang biktima ug ang suspek nga pulos armado og kutsilyo. Sumala pa ni Cabrera walay nakaulang sa duha samtang nanagan sa kahadlok ang mga tawo. Si Alfornon nakaangkon og tulo ka samad dinunggaban sa dughan ug gidali pagdala sa South General Hospital sa maong lungsod apan gideklarar nga dead on arrival.

Samtang ang suspek nakaangkon usab og samad dinunggaban sa walang bahin sa tiyan ug gidala sa Minglanilla District Hospital apan gibalhin sa Vicente Sotto Memorial Medical Center (VSMMC). (BANAT NEWS)