Bolo mihilak

CEBU, Philippines - Nakahilak sa tumang kaguol atubangan sa iyang mga kaubanan sa Hunta Probinsyal si First District Board Member Juan Bolo gumikan paghan-ok kaniya sa tanang pagbasol sa gidangatan sa Balili deal atol sa ilang sesyon kagahapon sa hapon.

Si Bolo sa iyang walo ka pahinang speech mipadayag sa iyang kasagmuyo nga siya ray gibasol sa nahitabo bisan ang tibuok sakop sa Hunta mipirma man sa pagpalit sa maong lote, ug ingon man hasta ang iyang pamilya naapektahan na sa maong isyu.

“It hurts me so much and to my family,” sumala pang Bolo dihang mihunong og kadiyot sa iyang walo ka pahinang pamahayag nga maoy labing unang higayon sukad nga mibuto ang maong kontrobersya.

Miluha ug nausab ang tonada sa iyang tingog samtang nagpadayon hangtud nga natapos siya sa pagbasa sa iyang speech pagpanalipod sa iyang kaugalingon sa mga pagsaway.

“I never got a single centavo in this transaction and all prior transactions,” matud pang Bolo.

Ang Kapitolyo mipalit sa Balili property nga may gilapdong 24.73 ektaryas sa kantidad nga P98,926,800, nga karon migawas sa survey nga nasanapan og tubig sa dagat ug mangrove.

Si Bolo nagkanayon nga di makiangayong siya maoy iduot sa maong kontrobersya sanglit tanang miyembro sa Hunta man ang mi-approve niini tungod sab sa awtorisasyon ni Gobernador Gwendolyn Garcia.

Lakip ang asawa ni Bolo giingong nasakit na tungod sa maong isyu, samtang gikasagmuyo usab niya ang mga pangutana sa media kung siya bay mi-broker sa deal sa Balili, ug ingon man ang kabahin sa iyang balay sa Dapitan ug ang Dapitan Rural Bank nga diin duna sila'y shares.

Matud pa niya nga ang balay sa Dapitan iya sa iyang asawa ug kini ilang bakasyonanan nga gihimo na karong pension house.

Samtang si Naga mayor Valdemar Chiong nagtuong posibleng dili na madayon ang pagdam-ok sa coal ash sa barangay Tinaan, Naga tungod sa kontrobersiya sa pagkapalit sa lote sa Balili Estate nunot sa pagpahibawo sa Kapitolyo nga posibleng isibog niini ang napirmahang MOA ni Garcia ug mga opisyales sa Korean Electric Power Corp. kun mapatud-ang makadaot sa panglawas ang itambak nga abog sa carbon.

Matud pa ni Chiong nga tungod sa kainit sa maong kontrobersiya mitumaw ang reklamo sa mga molupyo sa lungsod dihang gipakita sa mga environmental lawyers ang pagka-contaminate sa tubig sa puso sa mga residente ug ingon man report nga duna nay nasakit niini sa mga molupyo.

Matud pang Chiong, kun mahinayon gyud gihapon kini mopahigayon unya siya og public consultation kabahin niini. (BANAT NEWS)