Polis sa Talisay palitan og dugang sakyanan

CEBU, Philippines - Ang kagamhanan sa Talisay nagplanong mopalit og dugang ekipo ug mga sakyanan alang sa kapolisan sa maong dakbayan, matud ni Konsehal Arturo Bas, chairman sa komitiba sa kahapsay ug kalinaw kagahapon.

Si Bas nga nahinabi sa Banat News nagkanayon nga ilakip nila sa ilang budget para sa sunod tuig ang gastuhonon sa maong mga kahimanan sa kapolisan sa syudad.

Matud ni Abatayo nga siya mismo maoy nangunay paghangyo kang Mayor Socrates Fernandez aron kapalitan og brand new model nga sakyanan ang kapolisan sa Talisay.

Gawas sa brand new nga sakyanan, naglaraw pa sila nga mopalit pa sila og surplus nga sakyanan nga ikaabag-abag sa kalihokan sa kapolisan.

Gawas sa sakyanan, ang siyudad nagplano usab nga mopalit og mga hand held radio, alang sa komunikasyon sa kapolisan sa pagtubag sa unsa mang mga emerhensiya o mga insidente. Si Superintendent Henry Biñas sa pakighinabi sa Banat News mibutyag nga ang mga sakyanan nga gigamit nila karon mao ang duha ka Terrano, duha ka multicab, usa ka blue jeep nga gihatag niadto sa kagamhanan sa probinsiya, usa ka Isuzu Elf nga issue gikan sa Philippine National Police ug tulo ka motorsiklo.

Apan ang Isuzu, usa ka Terrano ug usa ka multicab dili na magamit nila karon kay pulos na guba ug wala pa maayo.

Sa traffic division diha sa Tabunok, may duha ka multicab, usa ka rocsta nga jeep nga karaan ug lima ka motorsiklo diin tulo niini ang gigamit sa mga motor riding cop sa pag-roving sa kadalanan ug pagmando sa trapiko. Sa detention cell, nagyaka na usab ang usa ka rocsta nga jeep tungod sa ka karaan na niini busa wala nay masakyan kung dunay mga piniriso nga ibalhin ngadto sa city jail. Matud ni Biñas sa pagkakaron ang usa ka multicab lang una ang ilang gipagamit diha sa detention cell.

Ang police station sa Poblacion adunay upat ka operational nga hand set radio nga gikan sa provincial office samtang sa traffic division duna kini napulo ka unit sa hand set radio nga gihatag gikan sa siyudad. – BANAT NEWS