Social Welfare Officer ipatawag, Housing materials 'sub-standard'

CEBU, Philippines - Gikatakdang ipatawag ni Bise Mayor Carlo Pontico Fortuna si Mandaue City Social Welfare Officer Violeta Cabada alang sa paghatag og katin-awan sa gipanghatag nga mga housing materials ngadto sa mga biktima sa sunog sa barangay Umapad sa maong dakbayan nga ilang gituohang reject ug baratohon.

Ang maong reklamo unang gipadangat sa mga biktima ngadto kang Umapad barangay Kapitan Zaldy Lumapas kinsa mipadangat usab sa maong reklamo ngadto kang Bise Mayor Fortuna. 

Si Fortuna nga nahinabi sa Banat News miingon nga mokabat sa P6 milyones ang gigahin alang sa pagpalit og housing materials sa 505 ka pamilya nga biktima sa sunog sa barangay Umapad.

Dugang pa niya nga mohimo sila og pakisusi sa gireklamong kalidad sa 12 ka panid nga plywood ug 10 ka panid sa sin nga kadudahan kaayo ang kantidad niini. Si Fortuna mipasabot nga nagkantidad og P10,000 nga housing materials ang ilang gigahin alang sa matag pamilya nga biktima sa sunog sa Purok Mangga ug Purok Limonsito sa barangay Umapad.

Sa ilang pakisusi, nasutang kadudahan kaayo ang kalidad niini nga nagkantidad og P10,000 nga mga housing materials tungod kay hilabihan man ka nipis ang sin ug reject usab ang kalidad sa plywood nga gipanghatag.

Dugang nilang lakang nga himuon mao ang pagpa-canvass sa presyo sa mga tindahan sa housing materials pagsuta sa tinuod nga kantidad niini kun wala bay kahiwian sa pagpalit niini.

Hinuon si City Administrator Briccio Boholst namahayag ngadto sa mga tigbalita nga mihimo na sila og pakisusi pagsuta kun tinuod ba ang maong reklamo ug midugang nga mitumaw ang maong reklamo gikan sa kampo sa oposisyon maong kadudahan usab nga gisambugan kini og pamolitika. – BANAT NEWS