Gipusil kay giingong 'isog'

CEBU, Philippines - Gipusil ang usa ka mag-uuma samtang nagtikad sa iyang yuta sa sitio Olhos barangay Usmad sa bukirang bahin sa lungsod sa Argao niadtong Sabado sa alas 5:00 sa kahaponon.

Ang biktima mao si Mauro Panerio, 51, nagpuyo sa nahisgutang lugar samtang ang suspek mao si Jerry Mendoza alyas Tura, 19, nagpuyo gihapon sa maong dapit.

Matud ni PO2 Von Tecson sa Argao Police Station dihang nahinabi sa Banat News, ang biktima nangguna sa iyang mga tinanom dihang kalit lang miabot ang suspek nga gituohang hubog ug masuk-anong miingon nga “Isog jud ka nong!”

Diha-diha mibunot ang suspek sa giluklok sa hawakan niini, ang wala matinong kalibre sa armas ug gipusil makaduha ka higayon ang biktima.

Maayo nalang nakabantay ang biktima ug kini nakadagan   apan nasamdan kini sa walang bahin ibabaw sa iyang paa.

Ang suspek sa kahadlok wala na mogukod ug daling misibat pahilayo nga hangtud sa paghimo ning balita padayon pang gipangita sa kapulisan.

Samtang ang biktima daling gihatod sa tambalanan diretso dinhi sa dakbayan sa Sugbo alang sa tukmang medikasyon. – BANAT NEWS