Kiha ni Bercede pamolitika - Carlo

CEBU, Philippines - Gibati og katahap si Bise Mayor Pontico Carlo Fortuna nga adunay bulok politika ang tinguha ni Banilad Barangay Kapitan Glenn Bercede nga pagpasaka kaniya og kaso sa Ombudsman Visayas tungod sa padayon niyang pagdawat og Representation Allowance ug Traveling Allowance (RATA) bisan kun nagbaton na siya og sakyanan nga iya sa kagamhanan sa maong dakbayan.

Si Fortuna nga nahinabi sa Banat News mipadayag nga dili mahiklin ang katahap nga sagol politika ang maong lakang sanglit nakaatbang man niya kini sa pagka-bise mayor niadtong 2007 election. Hangupon hinuon ni Fortuna ang maong lakang ni Bercede sanglit salig siyang wala siya'y gihimong anomaliya sa iyang katungdanan isip bise mayor sa dakbayan. Gitataw ni Fortuna nga ang Starex van nga sakyanan nga iyang gidawat wala pa kabayri sa kagamhanan sa dakbayan sanglit nagpadayon pa gihapon ang proseso sa mga dokumento niini. Dugang pa niya nga personal pa niyang kwarta ang gibayad sa gipatubil nga gasolina sanglit wala man usab siya kahatagi og fuel allocation sa kagamhanan. – BANAT NEWS