CEBU, Philippines - Nalandig sa tambalanan ang usa ka negosyante human makaangkon og dakong samad sa ulo dihang gitulis samtang naglakaw paingon na untang mamauli kauban ang iyang kapuyo sa sitio Badiang barangay Calape lungsod sa Daanbantayan niadtong Sabado sa alas 4:00 sa kaadlawon.
Ang biktima mao si Jonathan Tumulak, dunay kapuyo nga si Celeina Saladaga, pulos nagnegosyo og ginagmay'ng tinda-tinda sa maong lugar samtang ang suspek mao ra usab ang ilang silingan nga si Bryan Sagon, 19.
Subay sa imbestigasyon nila ni PO3 Romeo Basubas sa Daanbantayan Police Station, ang biktima kauban sa kapuyo niini paingon na untang mamauli gikan nga naninda sa sitio Badiang Proper apan walay kalibutan nga gisundan sila sa suspek samtang naglakaw daplin sa karsada paingon sa pinuy-anan niini.
Pag-abot sa maong lugar, kalit lang gipadul-an sa suspek ang biktima ug sa walay daghang pangutana gihapak og bato ang ulo niini hinungdan sa pagkatumba niini ug dayon daling gikuha sa suspek ang wala pa matinong kantidad sa kwartang halin niini diha sa bulsa sa karsones sa biktima dayong sibat pahilayo.
Samtang ang kapuyo sa biktima nga nahadlok daling midagan ug nanawag og tabang hangtod nga nakaresponde ang mga polis ug gihatod kini sa Daanbantayan District Hospital ang biktima nga walay panimuot human makaangkon og dakung samad sa ulo.
Ang suspek nadakpan sa kapulisan. – BANAT NEWS