Mini-Bus midam-ag sa 15-anyos

CEBU, Philippines - Patay nang nadangat sa South General Hospital ang usa ka 15-anyos nga katabang human madasmagi sa naghaguros nga EDC Liner minibus kagahapon sa alas 9:45 sa buntag diha sa National Highway barangay Tina-an dakbayan sa Naga.

Giila ang biktima mao si Nilda Bedillis, 15, taga barangay Butong lungsod sa Argao, nga nagtrabaho isip katabang sa pamilyang Mangila diha sa dakbayan sa Naga.

Ang biktima nakaangkon og grabeng kadaot sa ulo, ug ubang parte sa lawas.

Samtang ang nakadasmag mao ang EDC Liner GWP-915 gimaneho ni William Pongan, 50, taga Poblacion 1 lungsod sa Carcar kinsa mitahan gilayon sa kapulisan human sa maong insidente.

Si PO3 Francisco Codeñera sa Naga Police Station nga gikahinabi sa Banat News nagkanayon nga ang biktima nagkuyog sa iyang amo nga naglakaw sa nahisgutang dapit apan kalit lang nilabang hinungdan nga nadasmagan sa mini bus nga paingon dinhi sa dakbayan sa Sugbu. Matud pang Codeñera naapikihan na si Pongan aron molihay tungod kay giingong kalit kaayo ang paglabang sa biktima. Human sa insidente ang driver nga si Pongan, daling mipaturatoy sa pagpadagan sa sakyanan gumikan sa kahadlok nga kulatahon sa mga tawo apan ni-diretso kini sa police station samtang ang biktima gidala kini sa laing pribadong sakyanan diha sa South General Hospital.

Ang kapolisan sa Naga sa sayo pa kagahapon human sa aksidente naglisod pagpangita dayon sa agalon sa biktima aron pagkuha og kumpletong detalye sa hitabo.

Gikumpirmar usab sa taga Operations Branch sa CPPO nga hangtud kagahapon sa hapon wala pa gyud makalabay ang Naga og report labot sa maong aksidente, kini bisan paman sa memorandum sa direktor sa CPPO nga gikinahanglang dili maabtan og duha ka oras dunay report nga maduso sa operations branch sa CPPO. – BANAT NEWS