Giunay og pusil sa barkada angol

CEBU, Philippines – Naangol ang usa ka tawo human kini unaya og pusil sa iyang barkada dihang nangalasbag na sila samtang nagkinantahay atol sa gitambongan nilang birthday party didto sa barangay Canse, lungsod sa Tuburan, niadtong Biyernes sa alas 10:30 sa gabii.

Ang biktima mao si Francisco Dakay, 19, ulitawo, nga taga sitio Hunop, barangay Canse, samtang ang suspek mao si Roel Villarubia, 27, minyo, nga silingan ug barkada ra usab sa biktima.

Si SPO3 Lino Delos Santos sa Tuburan Police Station mibutyag sa Banat News nga samtang nag-videoke sila sa balay ni Amelito Igpit nga nagsaulog sa iyang birthday, puwerting linalaay nila og sagolsagol nga bino ug dihang nangahubog na, kalit lang nagpasikat ang suspek pinaagi sa paglanit sa iyang armas nga kalibre .38 aron daghang makakita niini. Gipatong pa kini sa iyang paa samtang padayon sa ilang inom ug kinantahay.

Apan gibadlong sa biktima ang suspek nga ipahipos ang iyang armas aron paglikay sa disgrasya ug wala magdahum ang biktima nga gibati diay og kasuko kaniya ang suspek.

Dihang migawas ang biktima kay mangihi, gisugat kini sa suspek ug gipusil makatulo ka higayon. Ang biktima nakaangkon og tulo ka samad pinusilan, duha sa iyang paa ug laing samad pinusilan ibabaw sa sampot.

Gihatod dayon ang biktima ngadto sa Tuburan District Hospital apan gibalhin usab dayon sa hospital sa dakbayan sa Sugbo. – BANAT NEWS