Manananggot giliog og dunggab sa 70-anyos

CEBU, Philippines – Patay diha diha ang usa ka mananggiti human kini gisulong ug gidunggab sulod sa iyang payag sa usa ka 70-anyos nga ex-convict sa bukirang bahin sa sitio Kamperong barangay Pasol lungsod sa Alcoy niadtong Biyernes sa alas 7:30 sa buntag. Ang biktima mao si Rodulfo Cabillon, alyas Rudy Hubo, 58, nga nagpuyo sa nahisgutang lugar samtang ang suspek mao si Victor Jimenez, 70.

Subay sa inisyal nga imbestigasyon   ni Insp. Wilfredo Tauto-an, hepe sa Alcoy Police samtang ang biktima naglingkod sulod sa payag kalit miabot ang suspek ug mikomprontase sa biktima kabahin sa nawalang manok igtatari.

Gidudahan sa suspek nga ang biktima maoy mikawat niini, apan ang naulahi kusganong mihimakak niini nga miresulta sa ilang init nga panaglalis ug wala makabantay ang biktima nga mibunot sa giluklok nga kutsilyo ug sa walay daghang pangutana gidunggab ang biktima sa ubos nga bahin sa walang liog ibabaw sa abaga.

Matud sa mga nakasaksi nagsirit sirit og maayo ang dugo agi sa samad dinunggaban ug paglabay sa pipila ka gutlo hinay-hinay kining nahagba ug nawad-an sa panimuot ug wala na matabang hangtud namatay, ang suspek misibat human sa hitabo.

Ang mga niresponde nga polis sa crime scene naka recover og itom nga kalo, puti nga tsinelas, senina ug shorts nga nagkadugo nga gisulod sa balde nga gihumolan og tubig nga gituohang iya sa biktima.

Daling gipahigayun sa kapulisan ang hot pursuit operation ug paglabay sa pipila ka gutlo nadakpan ra ang suspek didto sa pinuy-anan niini. - Darrel Carumba ug Guam Logroño (BANAT NEWS)