Georgia dawaton sa oposisyon - Guardo
CEBU, Philippines – Andam sagupon sa oposisyon sa dakbayan sa Sugbu ang igsuon ni Mayor Tomas Osmeña nga si Georgia Osmeña pagka-mayor sa siyudad sa 2010 elections.
Kini maoy gibutyag sa lider sa oposisyon nga si Jonathan Guardo kung mobalibad si Kongresista Antonio Cuenco sa ilang gitanyag niini, ang kongresista una nang mipadayag nga unya pa sa sunod buwan mopagawas sa iyang tubag sa awhag.
Apan sa sayo pa miingon si Cuenco, nga siya walay plano nga makig-atbang kang Bise Mayor Michael Rama sa nahisgutang posisyon tungod sa ilang kasuod nga managhigala.
Nagkanayon si Guardo nga kung dili dawaton ni Cuenco ang ilang tanyag, duna silay laing option ug kini naglakip sa pagsagop kang Georgia kinsa gustong ipasakop sa laing oposisyong lider nga si Atty. Aristotle Batuhan.
“Totol has also been pushing nga kung mahimo ipasud sab si Georgia sa oposisyon in case nga dili gyud modayon si Tony, so, posible sab na,” sumala ni Guardo.
Sa iyang bahin, mapasalamaton si Georgia sa nahuna-hunaang lakang sa oposisyon sa pagkuha kaniya nga mamahimong sakop niini, apan gitataw niining wala pa siya’y planong moipon sa oposisyon.
Si Georgia bag-uhay lang mipahibalong may plano siyang modagan pagkamayor sa umaabot nga 2010 elections, apan kini mipadayag hinuon nga layo pa ang eleksyon ug daghan pa ang mga kalamboan nga moabot.
“Before sa election anything can happen pa, pero as of now, wa pa koy plano nga mokuyog sa oposisyon,” nagkanayon si Georgia Osmeña. – Elly Bolonos (BANAT NEWS)
- Latest
- Trending
