Retiradong pulis gitigbas

CEBU, Philippines – Samaran sa ulo ug lawas ang usa ka bag-ohay palang miretirong opisyal sa kapolisan human kini tigbasa sa iyang silingan sa Purok Thunder, sitio Timpolok sa barangay Babag.

Ang biktima mao si (Retired) Chief Inspector Francisco "Frank" Baguio, 57, residente sa maong dapit ug kanhi hepe sa Homicide Section sa Lapulapu City Police Office nga bag-o palang miretiro ning tuiga.

Samtang ang gitumbok nga suspetsado mao ang iyang silingang si Gennes Carreon, 30, nga nasamdan usab diha sa iyang kalawasan human mailugi sa iyang gidalang sundang sa biktima.

Base sa imbestigasyon ni SPO1 Frederick Eslit sa Crime Against Persons (Homicide Section) nasayran nga samtang natulog si Baguio kalit lamang gibato ang iyang panimalay sa usa ka tawo hinungdan nga iya kining gisusi ug mao nalay iyang nakit-an ang suspek diha sa gawas. Atol sa pagsita ni Baguio mitumaw ang ilang panaglalis human mipadayag si Carreon nga nakita niya ang asawa niining(asawa ni Carreon) misulod sa panimalay ni Bagiuo apan gipanghimakak kini ni Baguio.

Human mahusay ang maong panaglalis wala magdahom si Baguio nga sa iyang pagpahulay og balik, mibalik usab si Carreon dala na ang mahait nga hinagiban ug misaka sa panimalay sa maong polis dayong tigbas kang Bagiuo.

Si Baguio bisan samaran sa iyang ulo ug sa kilid nga bahin sa lawas nakahimo pa gihapon pagsukol ngadto ni Carreon nga nakamugna og komosyon hinungdan usab nga nangabot ang mga kabanay ni Baguio ug gitabangan pagmakmak ang suspek hinungdan sa mga samad nga naangkon sa suspek.

Gidali og dala si Baguio sa Lapulapu City District Hospital ug gibalhin kini sa Mactan Doctors Hospital ug kasamtangang giobserbahan sa mga mananambal, samtang si Carreon gidala sa tambalanan tungod usab sa samad tinigbasan sa kalawasan.

Nasuta usab sa Banat News nga ang nakita ni Carreon nga iyang gituhuang iyang asawa mao ang anak ni Baguio nga matud pa adunay susamang pamayhon sa asawa ni Carreon.

Nasuta usab nga si Carreon gibuwagan sa iyang asawa niadto pang bulan sa Mayo niining tuiga gumikan sa problema sa ilang pagpuyo ug kanunay nilang panag-away ug hasta si Baguio maoy dangpan sa asawa ni Carreon aron magpatabang. - Uban sa report ni Romeo Limpangog (BANAT NEWS)