Bise Mayor Carlo Fortuna ipa-Ombudsman

CEBU, Philippines – Gikatakdang pasakaan og kaso nga malversation of public funds si Bise Mayor Carlo Pontico Fortuna ngadto sa Ombudsman Visayas karong Lunes tungod sa gialegar nga padayong pagkubra niini sa iyang transportation allowance bisan kun nagbaton na kini og Starex van type nga sakyanan nga gipanag-iya sa kagamhanan sa maong dakbayan.

Si Banilad Barangay Kapitan Glenn Bercede kinsa kanhi kauban ni Bise Mayor Fortuna nga konsehal sa maong dakbayan maoy mopasaka niini og kaso.

Si Bercede sa press conference mipasabot nga iyang gihimo ang maong lakang dili lamang kanhi konsehal ug barangay kapitan kun dili isip magbuhis usab sa dakbayan.

Samtang si Atty. Francisco Amit, sakop sa management team ni Mayor Jonas Cortes sa press conference mipasabot nga gidili sa mga opisyal sa kagamhanan ang pagkubra sa ilang transportation allowance kun nagbaton na kini og sakyanan nga gipanag-iya sa kagamhanan lakip na usab ang gasoline allocation.

Si Bise Mayor Fortuna sa iyang bahin sa pakighinabi sa Banat News mipasabot nga gidawat niya ang sakyanan nga gihatag ngadto sa buhatan sa Sangguniang Panglungsod (SP) apan ang nakaparat kay wala kini gasoline allocation.

Matud pa ni Fortuna nga gisukip unta nila ang gasoline allocation sa ilang gahin apan subo kaayong palandongon kay gi-veto kini ni Mayor Jonas Cortes.

“Naay sakyanan, pero unsaon pagdagan ana nga wala may gi-allocate nga gasoline. Ang pagputol sa transportation allowance pagbuot sa accounting kana kun makita sa maong buhatan nga dili ta angayang modawat og transportation allowance,” matud pang Fortuna. - Romeo Limpangog (BANAT NEWS)