Building sa Fessags gisubhan

CEBU, Philippines - Gisubhan kagahapong adlawa ang bag-ong one-stop shop nga buhatan sa Firearms Explosives Security Service Agency and Guards Supervisory Section (FESSAGS) nga nahimutang sa Police Regional Office (PRO-7).

Ang kalihukan gipanguluhan ni Police Regional Office (PRO-7) Chief Supt. Lani-O Neres, mga opisyal sa PRO-7, Supt. Rex Derilo, sa Regional Security Agency Guard Supervisory Units (RSAGSU) ug ang pinasidunggang dinapit si Chief Supt. Ireño Almodiel Bacolod, ang director sa Civil Security Group (CSG).

Si Bacolod atol sa pagpamulong mipadayag nga ang buhatan sa FESSAGS dinhi sa Sugbu maoy labing daling maka-transact sa mga tag-iya’g armas sa pag-renew na sa ilang mga lisensya sa armas.

Matud pa niini nga kompleto kini sa ubang opisina nga kadtong mga stakeholders diha ra mo-proseso sa ilang mga dokumento sa armas ug gani ang kulang niini mao nalang ang pagbutang og booth sa Landbank aron diha na mobayad.

Gipasabot niini nga kabahin kini sa transformation program sa Philippine National Police (PNP) ingon man sa CSG nga mapalambo pa ang ilang serbisyo.

Gibutyag usab niini nga palambuon usab nila ang uban pang mga satellite nilang buhatan sa ubang lugar dinhi sa Kabisay-an ug Mindanao.

Sumala pa niini nga sukad gipalambo ang buhatan sa FESSAGS, paggamit sa mga modernong kahimanan, bag-o pamaagi sa proseso sa pag-renew sa lisensya sa armas niadtong 2007, dunay 10 mil ka tag-iya’g armas ang mi-renew sa lisensya apan midoble usab karong 2009 nga mosubra na sa 20 mil ang mi-renew. – BANAT NEWS