Gipusil sa kawatan naangol

CEBU, Philippines - Naangol ang usa ka lalaki dihang gipusil kini sa wala hiilhing kawatan didto sa sitio Sangi , barangay Pajo, dakbayan sa Lapulapu kagahapon sa kaadlawon.

Ang biktima mao si Fidel Ybanez Jr., ulitawo ,nga taga Sangi ug anak sa tag-iya sa multicab nga kawatan unta og CDI sa nahisgutang kawatan.

Si SPO1 Frederick Islet sa homicide section sa kapolisan sa maong dakbayan nagkanayon nga diha sa gawas sa ilang balay ang biktima kuyog sa higala niini dihang namatikdan nila ang usa ka wala hiilhing lalaki nga nagkamang-kamang sa ilawom sa gi-parking nilang multicab.

 Matud pa ni SPO1 Islet nga gibadlong sa biktima ang kawatan   apan milanit kini sa gitangkil niyang armas ug gipusil ang biktima.

Nasabak sa dughan ug tuong abaga ang biktima ug gihatod dayon kini ngadto sa Mactan Doctors Hospital sa barangay Basak sa dakbayan sa Lapulapu, samtang misirit dayon pahilayo ang kawatan nga mao karo'y gipangita sa kapolisan sa maong lugar. – BANAT NEWS