Miinom og muriatic nakalabira

CEBU, Philippines - Nakugang ang mga residente sa usa ka bukirang barangay sa Badian human ang kalabira sa usa ka mag-uuma ang napalgan sa iyang mga kabanay sa usa ka hilit nga lugar sa barangay Dagatan niadtong milabay’ng adlaw.

Una niini usa ka Pedro Bebelone, 38, nagpuyo sa nahisgutang lugar mi-report sa kapulisan sa Badian niadtong Huwebes sa buntag human nakakita'g kalabira nga ulo sa tawo ug mga bukog sa kalibunan sa ilang lugar.

Diha-diha sila si PO3 Jeremia Elardo ug mga kaubanang police daling niresponde sa lugar ug ilang naabtan ang mga nagpasad nga bukog sa tawo ingon man kalabera sa ulo, uban sa mga personal nga kagamitan ingon man usa ka botelya sa malathion nga usa ka pestisidyo tupad sa kalabera.

Ang maong kalabera gihipos sa kapulisan ug gidala sa kapilya sa St. Agustin sa nahisgutang lugar apan pagkahapon sa maong adlaw ang mga kabanay miila niini nga kini mao si Ireneo Bebelone, 56.

Sa gipahigayong imbestigasyon nila ni PO3 Elardo, ang mga kabanay niini ug silingan mitug-an nga si Bebelone dugay nang nagkabuwag sa iyang asawa ug nia na dinhi sa dakbayan sa Sugbu.

Nasuta sa imbestigasyon nga niadto pang bulan sa Mayo ning tuiga si Bebelone, ang mibaligya sa iyang panimalay ngadto na sa iyang silingan ug milarga sa dakbayan sa Sugbu nga wala mopahibalo.

Sukad niadto wala na gyud makit-i pa si Bebelone diha sa ilang dapit ug nakurat nalang sila niadtong Huwebes sa alas 10:30 sa buntag dihang nakit-an kini sa iyang mga kabanay   sa kalibunan nga kalabera na.

Dugang nakuhang impormasyon sa kapulisan nga si Bebelone, maayo kining tawo, ug wala gyud sila makadungog nga duna kini gikaaway ingon man kontra diha sa ilang lugar.

Dako ang pagtuo sa mga kabanay ni Bebelone nga posibleng naghikog kini pinaagi sa pag-inom niini og pestisidyo human wala na makaagwanta sa gihambin niining problema sa pamilya.

Gituuhan usab sa mga kabanay nga posibleng mipauli kini diha sa ilang lugar nga wala lang usab nila mahibaw-i kun kanus-a ug miinom og hilo aron sa pagpakamatay diha sa kalibunan sa ilang barangay. – BANAT NEWS