Ace lig-on kaparang ni Gwen - Tomas

CEBU, Philippines - Miapil na si Mayor Tomas Osmeña pag-awhag kang Tourism Secretary Ace Durano nga padaganon pagka-gobernador sa Sugbo sa 2010 elections.

Alang sa mayor, ang kalihim maoy labing lig-on unya nga kandidato nga makatumpag kang Gobernador Gwendolyn Garcia sa subli niining pagpapili sa katungdanan.

Gipasalig ni Osmeña ang siyento porsyento nga suporta ang iyang ihatag ngadto kang Durano kung kini makumbinser pagpapili sa nahisgutang posisyon.

Andam usab ang mayor pagtabang kang Durano nga makakuha og funding gikan sa gawas sa nasud alang sa mga proyekto niini kun kini mahimo nang gobernador.

Gipaniguro usab ni Osmeña nga magkauli ang maayong relasyon sa dakbayan ug lalawigan kun ang kalihim na maoy modumala sa probinsya.

“It’s the dream of every Cebuano in the City and the province to get together and I can give assurance 100% that it’s going to happen if Ace is governor and I will give a 100% assurance that it’s not going to happen if Gwen is the governor,” sumala ni Osmeña.

Gani, miingon si Osmeña nga posibleng mahatagan na og katumanan ang mga proyekto sa probinsya dinhi sa siyudad kun ang kalihim na ang gobernador.

Kini sama sa Ciudad project sa Kapitolyo diha sa Banilad nga gipahunong sa kagamhanan sa dakbayan human magkabingkil ang duha ka lokal nga kagamhanan.

Nagtuo si Osmeña nga dako ang kahigayonan nga si Ace ang modaug kun kini makadesidir nga magpapili pagka-gobernador itandi sa plano niining mag-senador.

Kini tungod kay ang mga tawo sa probinsya giingon ni Osmeña nga wala na makauyon sa mga pamaagi ug pagdumala ni Garcia.

“I know that most of the mayors don’t like her and the barangay captains are not allowed to enter her office,” nagkanayon si Osmeña.

Masaligon ang mayor nga anaa sa maayong mga kamot ang probinsya ug kini molambo pa kun ang kalihim na maoy mudumala niini.

Midugang si Osmeña nga makabenipisyo usab ang dakbayan sa maayong pagdumala sa lalawigan tungod kay dili na manimpalad ang mga molupyo niini dinhi sa siyudad.

Ang giingong dili maayong pagdumala sa probinsya maoy gibasol sa mayor nga midaghan ang mga squatter ug ang mga sidewalk vendor dinhi sa dakbayan. – BANAT NEWS