Doktor gidunggab sud sa videokihan

CEBU, Philippines - Nabuslot ang tiyan sa usa ka doktor ug nalandig sa tambalanan dinhi sa dakbayan sa Sugbu human giingong gidunggab sa iyang silingan kagahapon sa kaadlawon sulod sa usa ka videoke sa barangay Tayud sa lungsod sa Liloan.

Ang nadunggaban giilang si Dr. Charley Cabahug, nagpuyo sa maong dapit samtang gitumbok nga midunggab kaniya mao ang silingang si Marlon Villa, 44, usa ka estambay.

Matud pang SPO1 Claudio Castro,Jr. sa Liloan Police Station sa pakighinabi sa Banat News nagkanayon nga ang biktima uban sa iyang higalang nag-inom ingon man nagkanta-kanta niadtong tungura. Sumala pang Castro nga samtang nagkantahay, ang suspek ug ang higala niining giilang si Digoy Pilapil nagkomedyahay nga wala ikahimuot sa biktima.

Dugang pang Castro nga nasuko ang doktor ug miresulta kini sa sinukmagay sa duha apan sa tanto nilang harong wala makabantay ang biktima nga milanit og kutsilyo ang suspek ug dayong dunggab sa tiyan sa maong doktor.

Ang suspek wala hinuon makaugpo sa mga mirespondeng mga polis ug kagahapon adlawa gipasakaan na og kasong frustrated homicide.

Dugang pang Castro nga posibleng nasuko ang biktima sa bugal-bugal sa mga suspek maong iyaha kining gikomprontase. – BANAT NEWS