Noynoy way ayo - Tomas

CEBU, Philippines - Suportado sa pipila ka mga Sugboanon si Senador Benigno Simeon “Noynoy” Aquino III sa pagpahibalo niini kagahapon nga modagan pagka-presidente sa 2010.

Kini bisan dili kumbinsido si Mayor Tomas Osmeña sa abilidad ni Aquino pagdumala sa nasud kun kini mapiling presidente.

Apan si Atty. Democrito Barcenas, kanhi presidente ug sa Integrated Bar of the Philippines (IBP-Cebu Chapter) ug kanhi OIC vice governor sa Sugbo mihangop sa desisyon ni Noynoy.

Si Barcenas ug ubang mga opisyal sa Sugbo nangulo sa gilusad nga Noynoy for President Movement pinaagi sa signature campaign. Tungod sa desisyon sa batan-ong Aquino, kompiyansa si Barcenas nga dili bulingbulingan ang mga maayong mithi nga gibilin sa namatay niyang inahan nga kanhi presidente ug amahan nga kanhi senador pagpatigbabaw sa demokrasya sa nasud.

Alang kang Barcenas, ang Pilipinas nagkinahanglan karon og seryoso ug matinud-anong lider nga tahasan pagdumala sa nasud dili susama sa ubang mga politiko nga nagpakita sa ilang kasikat pinaagi sa mahal nga bayad sa advertisement niini sa radyo ug telebisyon. Apan si Osmeña mipadayag sa iyang pagduda sa kapabilidad sa senador human usab modeklarar si Noynoy nga magpapili pagka-presidente sa 2010 elections.

Matud ni Osmeña nga nahimong kongresista si Aquino sulod sa tulo ka termino, apan walay nadunggan nga dakong accomplishment niini.

Ang senador mao karon ang chairman sa Committee on Local Government sa Senado. Apan giingon ni Osmeña nga wala usab kini nahimong kausaban.

Gitataw sa mayor nga nalatid sa balaod nga ang Local Government Code amendahon matag lima ka tuig, apan sukad kini naaprobahan niadtong tuig 1990, giingong walay bisan ‘draft’ na lang sa kausaban niini nga nahimo ni Aquino.

“It’s very important for us to find out how is the next president going to handle or treat the local government units... What is the future of local government under Noynoy Aquino? Unsay iyang nahimo?” pangutana pa ni Osmeña.

Bugtong pakunswelo ni Osmeña ngadto sa anak ni kanhi Pres. Corazon Aquino mao nga kini sama kang Senador Mar Roxas nga usa ka desenting tawo. Si Roxas nga mao untay suportahan ni Osmeña sa pagka-presidente, mag-bise-presidente na lang ni Noynoy sa sunod tuig nga eleksyon. Apan giklaro sa mayor nga bisan kun siya mosuporta kang Roxas pagka-bise-presidente, apan kini dili automatic nga mopaluyo kang Aquino. Gipadayag hinuon ni Osmeña nga siya nagpabilin pa’ng bukas kun kinsa ang paluyohan nga presidentiable sa umaabot nga piniliay.

“I have to do some soul-searching, ang baruganan sa among grupo is to make a decision of what is best for our constituents, it’s very fundamental,” sumala ni Osmeña. Nasayran nga lakip sa gipilian sa mayor nga paluyuhan sa pagka-presidente mao silang mga senador Loren Legarda, Francis “Chiz” Escudero ug Francis “Kiko” Pangilinan.

Samtang lahi usab ang panglantaw ni ANAD partylist representative Pastor Alcover Jr. gumikan kay nagtuo siya nga wala gihapoy mahimo si Noynoy kun ugaling mapili ug modaog pagka-presidente tungod kay alang niya napugos lang kini paglansar sa maong posisyon tungod sa emosyon sa mga tawo nga miduyog sa kamatayon sa inahan niini. –BANAT NEWS