CEBU, Philippines - Nadakpan sa kapolisan sa dakbayan sa Lapulapu ang usa ka tawo nga nanulis sa usa ka grupo sa mga lalaki ug babaye nga nag-overnight sa Vano Beach Resort sa barangay Marigondon sa dakbayan sa Lapulapu sa miaging kaadlawon.
Ang nadakpan mao si Mark Gonzales, hingkod , ulitawo nga walay trabaho ug nagpuyo sa maong dapit, samtang ang usa sa mga biktima nga mao ray nagpahingalan, mao si Mark Amarante, 26, minyo, ug mga kauban niini nga wala magpahingalan, nga pulos taga Banhigan, Dalaguete, Cebu.
Si PO3 Manolito Abellanosa sa theft and robbery section sa kapolisan sa maong dakbayan nga nahinabi sa Banat News miingon nga ang mga biktima nakuhaan sa ilang salapi ug mahalon nga mga cellphone .
Dugang pa niya nga nangatulog sa sulod sa cottage ang mga biktima dihang kalit lang gisulod sa suspetsado ug gipanguha ang mga butang niini.
Nahigmata ang mga biktima ug dihang nakita kini sa suspetsado dali kining gitionan sa armas ug mideklarar nga tulis.
Human makuha ang mga cellphone ug salapi sa mga biktima dali kining migawas sa cottage ug ang guwardiya nga nakamatikod misulay unta sa paggukod apan naulahi na kini tungod kay nakasibat na ang tulisan.
Si PO3 Abellanosa miingon nga nangayog panabang sa ilang buhatan ang mga biktima nga maoy hinungdan sa gihimo nilang hot pursuit operation nga miresulta sa pagkasikop sa suspetsado. - Romeo T. Limpangog (BANAT NEWS)