Nanghasi gibunala'g armas patay

CEBU, Philippines - Usa ka tawong nanghasi sulod sa videokehan gibunalan kini og armas de fuego ug namatay, didto sa dalan Spolarium, barangay Duljo Fatima, ning dakbayan sa Sugbo sa miaging gabii.

Ang biktima nailhan nga si Ariel Nacua, hingkod, nga taga Spolarium, samtang ang mibunal kaniya og armas wala pa hiilhi kay giputos ang dagway niini og tualya dihang gipusposan sa iyang armas ang biktima.

Giangkon ni  Analiza Nacua, igsuon sa biktima nga puwerting lasbaga sa naulahi ug nanghagis kini sulod sa videokehan sa maong lugar.

Giasoy ni Analiza ngadto sa kapolisan nga sa sayo pa, kainom sa iyang manghod ang kapuyo niya (Analiza) nga ginganlan niya og Roland.

Apan dihang nangalasbag na ang duha, gikuha ni Analiza ang iyang kapuyo ug nahibilin sa videokehan ang biktima ug didto gipanglabay ang mga bangko ug gipamuak ang mga botelya niini.

Unya nakita ni Analiza ang usa ka wala hiilhing tawo nga nagbukot og tualya sa dagway niini, nga milanit sa iyang armas de fuego ug gipuspos sa ulo sa biktima dayon mibiya kini sa maong lugar.

Si Analiza nga naluoy sa iyang igsuon, misulod sa videokehan ug gisakwat niya ang biktima.

Gihatod dayon nila kini ngadto sa Cebu City Medical Center diin gideklarar kini nga patay na sa paghiabot didto, samtang ang kriminal wala na gyud igkita sa kapolisan. - BANAT NEWS