Pagsuspenso sa Aboitiz ok ni Tomas

CEBU, Philippines -  Nakauyon si Mayor Tomas Osmeña pagpatuman sa Maritime Industry Authority (Marina) og suspension order batok sa Aboitiz Transport System aron did-an ang mga barko niini pagbiyahe sugod kagahapong adlawa human malunod ang Superferry 9 sa Sirawai, Zamboanga.

Sumala pa ni Osmeña nga iyang gipaluyohan ang gipakanaog nga suspension order sa Marina tungod kay matud niya mas importante ang kaluwasan sa mga pasahero ug ikaduha na lamang ang ekonomiya.

Kini tungod kay dili siya gusto nga mabutang sa risgo ang kinabuhi sa mga pasahero nga mosakay sa mga barko sa Aboitiz kay sa mga kargamento.

"Its a matter of safety procedure, suspend everything first and make a quick investigation basin og may laing barko nga ma-capsize gihapon for the same reason. So sakto gyud ang gihimo sa mga opisyal sa MARINA," matud ni Osmeña.

Samtang si Chester Cokaliong nga pangulo sa grupo sa mga shipowner dinhi sa Central Visayas nagkanayon nga motibugsok ang industriya sa barko sa tibuok nasud niining pagkasuspenso sa pagbiyahe sa Aboitiz.

Sumala pa ni Cokaliong nga maapiki ang mga nanag-iya sa mga barko niining dili makatarunganong polisya sa Marina ug Malacañang pagsuspenso sa prangkisa sa shipping company nga malunoran og usa lamang ka barko.

Matud pa niini nga inay tabangan sa gobyerno ang shipping company tungod kay naproblema na kini sa nalunod nga mahalong barko, samutan na hinuon kini pagpiit pinaagi sa pagdili sa pagpadagan sa ubang mga barko niini.

Makaabog sa mga investor ang maong polisiya, matud ni Cokaliong.

Sa susamang kalambuan, bisan sa suspension order sa mga biyahe sa mga barkong de pasaheroan sa Aboitiz, pabiling normal ang biyahe sa pipila ka mga barko niini.

Kagahapon, ang unang biyahe sa Aboitiz gikan sa Manila paingon sa Dumaguete natigayon kagahapon alas 8:30 sa buntag. Si Jess Supan, bise presidente on safety and security sa Aboitiz, mipadayag nga nagpabiling normal ang ilang operasyon nunot sa padayong hearing sa Marina.

Matud ni Supan nga gikatakdang moluwat og supplemental order ang Marina pagtugot sa biyahe sa tulo ka barko sa Aboitiz nga mao ang Supeferry 1, 12 ug 19.

Andam hinuon mokooperar ang Aboitiz sa gipahigayog imbestigasyon sa Marina, sumala pa ni Supan.

Apan gipadayag ni Commander Anelito Gabisan, chief of staff sa Coastguard District Central and Eastern Visayas sa dihang nahinabi sa Banat News nga ang ilang district commander nga si Commodore Rolando Dizon pormal na nilang mimando pagpatuman sa suspension order batok sa mga barko sa Aboitiz.  – BANAT NEWS