Mga vendor nag-holiday

CEBU, Philippines -  Wala mahinayon ang pagpatuman sa “Operation Linis” sa merkado sa T. Padilla ning dakbayan sa Sugbu kagahapong adlawa tungod kay ang mga vendors sa nahisgutang merkado publiko giingong mipatuman usab og kaugalingong vending holiday.

Matud pa ni City Market Administrator Racquel Bohol-Arce nga ang mga manindahay mismo maoy nihangyo kaniya nga iirog ang gitakda nilang operation linis tungod kay kadaghanan sa mga vendors giingong miduaw kagahapon sa Birhen sa Simala subay usab sa kapistahan ni Birhen Maria.

Tungod niini, giirog ni Arce ang vending holiday sa merkado sa T. Padilla karong umaabot nga Biyernes alang usab sa ipahigayong operation linis.

Ang vending holiday gipatuman sa City Market Authority ngadto sa kamerkaduhan sa dakbayan aron palimpyuhon ang tanang mga vendors sa ilang merkado.

Una nang gipatuman ang nahisgutang lakang diha sa Pasil Fish Market, Taboan Public Market, ingon man sa Ramos Public Market.

Human unya sa merkado publiko sa T. Padilla niingon si Arce nga ilang isunod ang Pardo Public Market pagpatuman sa vending holiday alang sa operation linis.

Gipadayag sa market administrator nga nagmabungahon ang ilang programa tungod kay nikooperar usab ang mga vendors sa kamerkaduhan.

Partikular nga limpyuhan sa mga manindahay atol sa operation linis mao ang ilang tagsa-tagsa ka mga pwesto, drainage system sa merkado ug uban pa. - Elly Bolonos (BANAT NEWS)