Balay sa aliwanay naugdaw

CEBU, Philippines -  Mikabat og P50 mil ang danyos sa usa ka balay nga nasunog didto sa barangay Aliwanay lungsod sa Balamban niadtong Lunes sa alas 2:30 sa kaadlawon.

Ang maong balay gipanag-iya ni Marlyn Margaja Lesme, 50, minyo nga taga Aliwanay.

Si PO2 Jose Baldecasa sa Balamban Police Station mibutyag sa Banat News nga human madawat ang alarma sa maong sunog, miresponde dayon ang mga sakop sa kabomberohan sa ilang lungsod apan tungod kay ang nahisgutang balay ginama sa pulos gaan nga mga dapat, dali kaayo kining gilamoy sa kayo ug pag-abot sa mga bombero sa lugar nga nasunogan, abo nalay ilang napupho.

Si fire investigator FO3 Jesus Balbona mibutyag nga depektusong koneksyon sa kuryente maoy hinungdan sa sunog nga gipaubos lang nila sa 1st alarm.

Wala hinuoy na-angol ug nakalas sa maong sunog kay nakabantay dayon ang mga nagpuyo niini ug daling nakagawas pahilayo sa nasunog nga balay. - Darrel A. Carumba (BANAT NEWS)