Negosyanteng Maranaw gitulis

CEBU, Philippines -  Gitulis sa tulo ka wala hiilhing tawo ang duha ka Maranaw nga babaye nga mga negosyante didto sa sitio Tugas, barangay Poblacion, dakbayan sa Lapulapu, kagahapon sa kadlawon.

Ang mga biktima mao sila ni Jumira Mangoranda, 29, minyo, ug Rubaysa Akmad Cabugatan, 28, minyo, kinsa pulos mga lumad sa Marawi City ug kasamtangang nagpuyo sa sitio Tugas.

Sila si PO3 Hajer Ahadjan ug PO3 Jumar Ybañez sa Crime Against Property sa kapolisan sa Lapulapu nagkanayon nga samtang naglakaw pauli na unta sa ilang balay ang mga biktima, ang tulo ka tawo kalit lang miduol kanila ug mideklarar nga tulis.

Ang mga tulisan nga pulos nagdala og armas de fuego ug kutsilyo maoy nakapakurog sa mga biktima hinungdan nga gitahan nalang nila ang ilang mga bag nga may sulod nga P30 mil, cell phone nga nagkantidad og P30 mil, ug relo de pulso nga nagkantidad og P18 mil ngadto sa mga tulisan.

Human masakiyo ang mga bag sa mga biktima dali kaayong nakalayas ang mga tulisan hinungdan nga bisan anino niini wala nay naabtan ang mga kapolisang miresponde sa maong tulis. - Bong Soriano (BANAT NEWS)