CEBU, Philippines - Patay ang usa ka basurero diha sa Inayawan Sanitary Landfill dihang naligsan sa trak sa basura niadtong miaging Sabado sa gabii.
Ang biktima naila nga usa ka Aljun Ybiernas, 16, molupyo sa sitio White Road diha sa barangay Inayawan ning dakbayan sa Sugbu.
Giangkon sa labaw sa Department of Public Services (DPS) sa Cebu City Hall, Engineer Dionisio Gualisa, nga ilang trak maoy nakaligis sa biktima.
Matud ni Gualisa nga posibleng wala makit-i sa driver ang basurero dihang kini niyabo sa basura diha sa nahisgutang landfill.
Apan giklaro sa labaw sa DPS nga ang driver sa garbage truck anaa nag-alagad sa barangay Cogon Ramos ubos ni kapitan Omar Durano. “Ato tong trak pero gipahuwaman ra man to nato sa Cogon-Ramos, ila tong driver ang nakaligis sa basurero,” sumala ni Gualisa.
Ang suspetsado naila nga si Paquito Teves, giingong taud-taud nang driver sa nahisgutang barangay ug kasamtangang gitanggong human makaligis, apan kini gibuhian ra usab tungod sa giingong pag-intirbiner ni kapitan Durano.
Gisuwayan sa Banat News pagkuha og habig ang kapitan apan kini wala sa barangay hall ug dili usab motubag sa iyang cellular phone.
Ang barangay secretary nga si Alene Pleños nibutyag nga gitinguha ni kapitan Durano nga matabangan ang pamilya sa biktima.
Andam usab nga motabang si Engineer Gualisa sa gikinahanglang mga dokumento aron mabayran ang pamilyang Ybiernas sa insurance. Nagkanayon si Pleños nga posibleng makabalik ra si Teves sa iyang trabaho sa barangay human unya malubong ang patay’ng lawas sa biktima.
Ang patay’ng lawas ni Ybiernas kasamtangang gihaya sa ilang pinuy-anan diha sa White Road ug kini gitakdang ilubong sa adlaw nga Sabado. (Elly Bolonos) (BANAT NEWS)