Mga barko de pasaheroan sa Aboitiz suspendido

CEBU, Philippines - Temporaryong suspen-sohon ang operasyon sa tanang mga passenger vessels sa Aboitiz Transport Services (ATS) samtang magpadayon ang imbestigasyon sa pagkalunod sa Superferry-9 didto sa kadagatan sa Zamboanga Peninsula niadtong Domingo sa buntag nga miresulta sa kamatayon sa siyam sa sobra 900 ka mga pasahero og tripulanteng sakay niini.

Ang undersecretary sa Maritime Transport Thompson Lantion maoy mipahibawo niini nunot sa gitakdang pag-isyu og showcause order batok sa Aboitiz management ug ang gitakda nga pagpahigayon sa audit inspection aron pagtino kun seaworthiness pa ba ang mga barko niini.

Matud pa ni Lantion atol sa interview sa usa ka estasyonan sa radyo ang Maritime Industry Authority Marina ingon man ang Philippine Coastguard maoy maghiusa paghulma sa Special Board of Marine Inquiry SBMI ug posibleng sugdan dayon ang pormal nga imbestigasyon ugmang adlawa.

Matud pa ni Lantion apil sa i-summon ang pipila ka mga naluwas nga pasahero aron mohatag kini og dugang katin-awan sa maong panghitabo ug aron paghatag og katin-awan sa report nga daan nang nagtakilid ang maong barko sa paggikan pa niini sa pantalan sa General Santos City niadtong Sabado sa buntag.

Samtang gibutyag sa chief of staff sa Coastguard District Central Eastern Visayas Anelito Gabisan dihang nahinabi sa Banat News nga apil sa posibleng susihon ang taho nga nabuslot ang barko.

Matud pa ni Gabisan sukad kagahapon sa udto miabot na og 966 ang tanang pasahero ug tripulante ang naluwas og duha nalang ang pabiling missing apan siyam ang kompirmadong namatay ug ang mga naluwas nga pasahero gihatod na karun sa Ilo-ilo, Manila ug ang uban gihatud balik sa General Santos City.

Ang maong barko gikan sa General Santos City ug paingon unta sa Ilo-ilo City dihang nalunod pag-agi sa maong lugar.)   (BANAT NEWS)