11-anyos naigo sa armas sa FTP

CEBU, Philippines - Naangol ang 11- anyos nga batang lalaki human kini maigo sa armas sa usa ka polis nga nagpailawom sa Field Training Program (FTP) ug nadestino sa Mandaue City Police Office (MCPO) sayo sa buntag niadtong Sabado diha sa sitio Sapa-Sapa sa barangay Ibabao, dakbayan sa Mandaue.

Ang biktima mao si Lenbert Hingosa, Grade 3 pupil sa Ibabao Elementary School ug ang suspetsado nga nakapusil mao si PO1 Richard Garcia Bayon-on, 30, lumad nga taga barangay Obodo sa lungsod sa Bantayan.

Si PO3 Protacio Tago Jr., sa Investigation Detection and Management Bureau (IDMB) miingon nga si PO1 Bayon-on diha sa sulod sa lawak sa giabangang apartment nga gipanag-iya ni Alberto Garcia nga nahimutang sa maong dapit.

Matud pa ni PO3 Tago nga paingon na kini sa iyang pagtambong sa duty ug sa pagbutang niya sa holster sa iyang .45 kalibreng pistola kalit kining mibuto ug miigo sa bungbong.

Wala magdahom si Bayon-on nga ang bala milapos didto sa silingang balay ug naigo ang bata sa dughan nga kasamtangang natulog uban sa iyang ginikanan. – BANAT NEWS