Cuenco wala pa motapon sa Kusog apan nagsabot

CEBU, Philippines - Gipanghimakak ni Cebu City South District Congressman Antonio Cuenco nga mitabok na siya ngadto sa Kugi Uswag Sugbu (Kusog) apan kini miangkong duna nay gihimong mga sabot-sabot tali kaniya ug sa mga sakop sa oposisyon sa dakbayan apan wala pay nakab-ot nga desisyon.

Ang lider sa oposisyon sa siyudad nga si Jonathan Guardo giingong maoy mipahibawo sa pormal nang pagtabok ni Cuenco ngadto sa Kusog.

Matud sa kongresista nga ang iyang pagbalhin sa Kusog maoy tinguha sa mga sakop sa oposisyon apan dili tinuod nga siya niuban na niini.

“Maoy ilang gusto pero wala ko mosanong, dili na tinuod, duna mi exploratory talks pero wala pay desisyon huwaton sa namo ang development sa taas,” sumala ni Cuenco.

Sa iyang bahin, dili igsapayan ni Cebu City Mayor Tomas Osmeña kung motabok na ang iyang kanhi kaalyado nga kongresista ngadto sa Kusog.

Ang mayor nga maoy labaw sa Bando Osmeña Pundok Kauswagan (BOPK) miingon nga walay laing kapaingnan si Cuenco human kini nila isalikway pipila ka tuig na ang nakalabay.

“We do not lose him, we rejected him, ang mga tawo sa Kusog they’re even rejected by me or rejected by the people, their life is nothing but rejection,” sumala ni Osmeña.

Wala usab mabalaka ang mayor nga mangombinsir si Cuenco sa mga kaalyado ug mga tigpaluyo sa BOPK kung kini miipon sa oposisyon.

Nagtuo si Osmeña nga pipila lang ang madala sa kongresista ug wala na gani kinahanglana nga siya mohatag pa og pasidaan ngadto sa ilang mga supporters.

“Wala na kinahanglana makasabot ra sila, anyway, it’s a democracy you can go wherever you want ayaw lang kalimti nga we lost him, we kicked him out,” matud ni Osmeña.

Miaslom ang relasyon nilang Osmeña ug Cuenco human sa nakalabay nga barangay elections tungod sa pasangil nga gibiyaan sa kongresista ang kaalyado nilang mga kapitan.

Butang nga gihimakak ni Cuenco uban sa pagpakita og kamatuuran nga iyang gitabangan ang mga barangay kapitan bisan sa iyang paglarga ngadto sa Amerika niadtong higayuna. – BANAT NEWS