Negosyante gipusil patay

CEBU, Philippines - Dead-on-arrival sa tambalanan ang usa ka negosyante human gipusil sa usa ka habal-habal driver niadtong Domingo sa gabii sa sitio Bahak, barangay Poblacion lungsod sa Lilo-an.

Ang biktima giila sa kapulisan nga si Ranulfo Yuson Sr., 50, nga operator og mga sakyanang de-pasaheroan nakaangkon og duha ka samad pinusilan sa iyang lawas.

Samtang ang gitumbok nga responsable mao si Nader Marikit, 25, taga barangay Tabla sa nahisgutang lungsod nga dali usab kaayong nakasibat human sa pagpamusil sakay sa iyang motorsiklo.

Si PO2 Rutchil Jugalbot sa Liloan Police Station nga gikahinabi sa Banat News nagkanayon nga si Yuson gipusil ni Marikit human molaban sa panag-away sa iyang anak nga si Ranulfo Jr. nga usa usab ka habal-habal driver nga gikabingkil sa suspek.

Giingong ang anak sa biktima nga wala makaagwanta sa ilang sungog-sungog mipauli ug mikuha’g sundang hinungdan nga ang biktima milaban usab sa iyang anak.

Gikataho nga gisukmag pa sa biktima ang suspetsado apan duna diay armas ang suspek ug kalit gipusil ang biktima duha ka higayon.

Ang biktima daling gidala sa iyang mga kabanay ug silingan sa usa sa mga tambalanan sa dakbayan sa Mandaue apan gi-deklarar kini nga patay sa mga doktor. – BANAT NEWS