Chiong gidid-an makaduol sa SC

CEBU, Philippines - Gidid-an na pagduol ang vice president sa Crusade Against Violence (CAV) nga si Thelma Chiong ngadto sa Korte Suprema aron unta mababagan ang pagtugot sa Department of Justice nga ibalhin og bilanggoan sa nasud sa Espanya si Paco Larrañaga.

Matud pa ni Chiong sa interview sa DyRF nga misulay na siya sa pagpangayo og tabang ni Chief Justice Renato Puno pinaagi sa sulat apan si Puno mitug-an kaniyang dili na makapanghilabot pa ang korte sa kaso ni Larrañaga ug kaubanan tungod kay nasentensiyahan na man kini sa korte.

Gawas niini, ang gibasehan sa petisyon sa pamilyang Larañaga mao ang RP-Spain Transfer of Prisoner Agreement usa man ka kasabutan sa duha ka mga lider sa nasud ug dili kini balaud.

Si Chiong miingong alang kaniya namatay ang hustisya tungod sa pagpanghilabot sa Malacañang sa kaso pinaagi sa DOJ ug ingon man usab sa kongreso pinaagi ni Senador Miriam Defensor Santiago.

“Gikapoy na ko pagpangita og hustisya sa kaso sa akong mga anak bisan og nagdugo pa ang akong kasingkasing. Maghulat na lang sa hustisya sa langit. Total ang gaba dili man magsaba,” matud pa ni Chiong.

Samtang si Gloria Resign Movement Cebu Chapter president Atty. Kit Enriquez mikwestyon sa pagtugot sa DOJ nga mabalhin sa pagkapriso sa Espanya si Larrañaga.

“Ang crime is territorial in character kay diri man sa Pilipinas nahimo ang krimen dinhi usab silbihan ang silot,” matud pa ni Enriquez ug midugang usab pagkwestyon sa dual citizenship ni Paco tungod kay kapin sa 12 na ka tuig na kining napriso sa bilanggoan sa Manila.

Dugang pa ni Enriquez nga mahimo lang makauli si Paco sa Espanya kun mahuman na niya og serbisyo ang sentensiya dinhi sa nasud.

Ang inahan ni Paco nga si Margarita Larrañaga sa mga report mipadayag sa iyang kalipay apan giingong uwahi na usab siyang napahibawo nga gitugotan sa DOJ ang iyang petisyon.

Dugang pa niini, sa higayon nga mabalhin na sa pagbilanggo si Paco sa Espanya adto na usab sila manimuyo didto tungod kay iyang gihulagway nga ‘friendly environment’ ang prisohan sa Espanya kay sa Pilipinas. – BANAT NEWS