Estudyante gipusil tiyan buslot

CEBU, Philippines - Nabuslot ang tiyan sa usa ka estudyante nga gikan pa sa inom dihang gipusil kini sa tulo ka wala hiilhing armadong mga tawo didto sa Osmeña Boulevard, sitio Limbaga, barangay Kamagayan, ning dakbayan sa Sugbo, alas 12:00 sa tungang gabii kagahapon.

Ang biktima nailhan nga si William Catagez, 26, 4th year Information Student sa Asian College , nga taga Dalan Spolarium, barangay Duljo, Fatima ning dakbayan sa Sugbo.

Sumala sa biktima nga puwerting inom niya uban sa iyang mga barkada dihang miundang siya kay mopauli na, apan samtang nag-atang siya og sakyanan , kalit lang siyang gipusil sa tulo ka wala hiilhing kriminal.

Human mabuslot ang iyang tiyan sa usa ka bala, nanirit dayon og panagan ang miluthang kaniya, samtang gidali usab siya paghatod ngadto sa Chong Hua Hospital sa mga nakasaksi sa maong hitabo.

Grabe gyud hinuon ang maong samad kay gikan sa walang bahin sa iyang kilid milapos ang bala sa iyang bukobuko.

Padayon pang gipangita sa kapolisan ang mga kriminal samtang ang mga tigpaniid nagkanayon nga mao ni angayang panaminan niadtong mga estudyante nga malangan sa pagpauli kay makig-inom pa sa barkada. (Lesley Caminade)   (BANAT NEWS)