Journalist Logarta pasidunggan

CEBU, Philippines - Usa ka dalan sa barangay Linao, dakbayan sa Talisay panganlan og Logarta street agi’g pasidungog sa usa ka peryodistang Talisaynon nga si anhing Jose G. Logarta kinsa nakigbisog hangtod sa iyang kamatayon sa pagpanalipod sa press freedom kon kagawasan sa prensa.

Aprobado na sa konseho sa Talisay ang Resolusyon Numero 2009-32-2 nga naghingalan sa   usa sa mga dalan diha sa barangay Linao nga Logarta street.

Ang maong karsada nagbaktas dapit sa national highway kilid sa VACPHIL ngadto sa Seaview Heights.

Ang tipik sa nahisgutang resolusyon naghandom kang anhing peryodista Jose G. Logarta, nga taga Lawaan I, dakbayan sa Talisay, Cebu nga angayang pasidunggan tungod sa iyang pagka-inila isip peryodista, labing una sa natad sa pamalita sa pamantalaan ug magtutudlo sa daghan na kaayong mga batan-ong tigbalita.

Gumikan kang Logarta, milipang ang maong propesyon ug usa na ka kusganon ug lig-ong industriya sa Sugbo.

Si Konsehal Shirley Belleza kinsa maoy tsirman sa Committee on Tourism, Heritage and International Relations ang miila sa mga journalism awards nga nadawat niadto ni Logarta.

Lakip sa mga nadawat nga award niini mao ang Citizens National Electoral Assembly Award sa tuig 1971; Singh Journalism Award for Editorial Writing sa 1973, ug Rotary Club of Manila Community Newspaper Award alang sa Republic News niadtong tuig 1978.

Gi-recognize usab siya sa University of Southern Philippines isip Outstanding Alumnus in Journalist sa tuig 1978.

Si Logarta kinsa kanhi reporter sa Pioneer Press ug Morning Times, ug associate reporter sa  Cebu Daily News, editor sa Republic News ug copy editor sa Sun Star Cebu.

Ang resolusyon kalabot niini mihaom usab sa kasaulogan sa Cebu Press Freedom Week ning semanaha. (Brenda D. Batuto)   (BANAT NEWS)