Scuba divers sa CCPO migraduwar

CEBU, Philippines - Mi-graduwar na ang ubang batch sa Cebu City Police Office (CCPO) nga CCPO Scuba Divers human sa kapin usa ka bulan nga pagtuon niini diha sa kadagatan sa dakbayan sa Lapulapu.

Ang graduation ceremony niini gipahigayon mismo diha sa headquarters sa CCPO kagahapong adlawa dinhi sa Police Regional Office (PRO-7) Chief Supt. Lani-O Neres maoy guest speaker sa maong kalihukan.

Nunot sa maong bag-ong skills nga nakat-unan sa mga polis sa CCPO dako ang pagtuo ni Neres nga mas molapad pa ang mamahimo nilang papel sa katilingban ug maapil na niini ang kalikupan, rescue operations panahon sa katalagman ug ingon man turismo.

Ang mga polis gi-train sa lisensyadong dive master nga si Nuli Nacua ug Eme Bonghanoy sa Confederation Mondial De Activities Subaquatic.

Lakip sa migradwar mao sila si Sr. Supt. Patrocinio Comendador, Sr. Insp. Michael Anthony Bastes, Sr. Insp. David Señor ug uban pa.

Sumala pang Neres mihatag og P20 milyones nga pundo ang National Disaster Coordinating Council alang sa maong programa ug ekipo. (Guam Logroño)   (BANAT NEWS)