Mekaniko gipapusil og tuyo?

CEBU, Philippines - Naliog pagkaigo sa usa ka bala sa armas de fuego ang usa ka mekaniko dihang giluthang kini sa wala hiilhing armadong tawo didto sa barangay Subangdaku, dakbayan sa Mandaue niadtong Biyernes sa hapon.

Ang biktima mao si Euginio Godinez Bolo, 31, ulitawo, nga taga Campo 8, dakbayan sa Talisay ug nagtrabaho sa trucking company nga gipanag-iya ni Evelyn Diano, 38 , nga taga Kimba, dakbayan sa Talisay.

Si Inspector Franco Rodulf Oriol, imbestigador sa Investigation Detection and Management Bureau (IDMB) sa Mandaue City Police Office (MCPO) miila sa suspetsado nga mao si Raul Diano, 48, nga usa ka negosyante nga taga Pit-os, dakbayan sa Sugbo ug bana ni Evelyn nga agalon sa biktima, ug kauban sa tawong miluthang sa biktima.

Matud pa ni Inspector Oriol nga nagbuwag na karon si Raul ug si Evelyn.

Segun sa imbistigasyon sa kapolisan nga ang truck de karga ni Evelyn nga kargado sa limestone nagpaingon na unta ngadto sa barangay Opao sa dakbayan sa Mandaue, aron i-deliver ang maong limestone, dihang naabiriya kini.

Isip mekaniko, ang biktima maoy gitawag sa iyang amo sa pag-ayo sa sakyanan, busa naulian dayon ang maong de karga.

Aron pagpuypoy sa kakapoy, gibangkahan ni Evelyn ang biktima ug gipalitan kini og matimo sa usa ka tindahan nga duol ra sa naabiriyahan sa sakyanan.

Apan wala na makaabot ang biktima ngadto sa tindahan aron unta motimo kay gipusil kini sa usa ka wala hiilhing tawo nga bag-o lang nanaog gikan sa usa ka motorsiklo nga gimaneho ni Raul ang bana ni Evelyn.

Ang biktima nga naigo sa liog gidala dayon ngadto sa Mandaue City Hospital samtang ang mga kriminal ug si Raul dali kaayong nakasibat    pahilayo gikan sa maong lugar human sa maong pagpamusil.   (BANAT NEWS)