CEBU, Philippines - Naguba ang usa ka bakery ug tindahan samtang usa usab ang naangol human mibuto ang usa ka liquefied petroleum gas (LPG) sa sitio Sudtungan barangay Basak dakbayan sa Lapulapu kagahapon sa kaadlawon. Ang biktima mao si Sulpicio Palagtiosa Alone, 21, taga Purok Caimito barangay Pusok dakbayan sa Lapulapu ug maoy baker sa Tatay Iskot Bakery kinsa nakaangkon og mga samad sa lawas ug paso.
Sa imbestigasyon ni PO3 Candido Barinque sa Crime Against Persons (Homicide), usa ka Murin Juvit, security guard sa BF Better Living Subdivision sa maong dapit nakatimaho og alisbo sa LPG maong iyang gipahibalo ni Alone.
Si Alone nga nagluto niadtong tungura daling misusi sa iyang lutoan ug gipalong ang ilang stove apan kalit nga mibuto ang tangke hinungdan sa pagkahugno sa atop ug pagkaguba sa maong bakery ug ang tupad nga tindahan.
Si Alone nga nakahiagom og daghang samad sa kalawasan ug mga paso gidali kini ug dala sa tambalanan diin luwas na kini sa makuyaw nga kahimtang. Ang pag-ulbo wala hinuon momugna og sunog apan nagbunga kini og kahadlok sa tawo tungod kay nagsikit-sikit lang ang kabalayan sa lugar. (Bong Soriano) (BANAT NEWS)