Gwen tak-om pa kang Noynoy

CEBU, Philippines - Tak-om pa ang baba ni Gobernador Gwendolyn Garcia kung suportahan ba niini o dili ang mitumaw nga tinguha sa oposisyon nga padaganon si Senador Noynoy Aquino sa pagkapresidente sa nasud ubos sa partidong Liberal Party.

Sa wala pa kini migikan paingon sa nasud sa Israel, alang sa opisyal nga biyahe, si Garcia mitug-an nga dili pa siya gustong mokomentaryo sa isyu sa pagdagan ni Noynoy kay alang sa gobernadora layo pa ang election.

Si Noynoy anak ni kanhi Presidente Corazon Aquino ug kanhi senador Benigno “Ninoy” Aquino nga dako og nahimong papel sa pagpabalik sa demokrasya sa nasud nga karon gituboy sa nagkadaiyang partido sa oposisyon tungod sa pagtuong dili kini parehas sa ubang mga politiko tungod sa legasiya sa iyang mga ginikanan.

Ang gobernadora nagkanayon nga sa sunod tuig pa siya makahatag og pamahayag kun si kinsa ang iyang suportarang kandidato sa pagkapresidente.

Mipasabot kining angayan nga paabuton una sa mga lokal nga mga opisyal nga nagplano usab mokandidato sa umaabot nga election nga hingpit nga makaduso ang mga presidential candidates sa ilang Certificates of Candidacy aron maklaro kun kinsa gyud ang tinuoray nilang suportahan. (Chester Abadilla)   (BANAT NEWS)