Bata naagtang sa saag nga bala namatay

CEBU, Philippines - Usa ka 7-anyos nga batang lalaki ang patay human maigo sa saag nga bala samtang nag-inusara sulod sa ilang panimalay niadtong Biyernes sa udto sa sitio Danao, barangay Western Poblacion lungsud sa San Francisco Isla sa Camotes.

Ang namatay giila sa kapulisan nga si Reymart Bancale, 7, nagpuyo sa nahisgutang lugar nakaangkon og samad sa iyang agtang gikan sa wala matinong bala sa armas nga nilapos sa luyong bahin sa ulo.

Gisubay pa karon sa kapolisan kung si kinsa ang tawong nagpataka og pabuto og armas nga nakaigo sa maong bata.

Ang biktima gidali unta sa iyang mga silingan pagdala sa Ricardo Maningo District Hospital apan namatay pipila ka minutos human gitabang sa mga doktor.

Sa report nga nadangat sa Operations Branch sa Cebu Provincial Police Office (CPPO) padayon pang naghimo’g dugang imbestigasyon labot sa insidente aron pag-ila sa responsable. (Guam Logroño)   (BANAT NEWS)