Patay sa sukmag

CEBU, Philippines - Patay ang usa ka 72-anyos nga lalaki human sukmaga sa iyang silingan tungod sa giingong pagselos sa naulahi kagahapon sa hapon diha sa sitio Kalimang, barangay Poblacion, lungsod sa Boljoon.

Ang biktima giilang si Luis Derama, nga taga diha sa lugar nga giingong giselosan ni Fortunato Mendez, 43, nga silingan sa biktima.

Si Derama naabtan pa nila ni PO3 Nicomedes Aleñabon ug PO1 Fortunato Batucan ug mao nay midala niini sa Oslob District Hospital apan patay na kini.

Matud pa ni SPO4 Cristino Uraca, deputy chief sa Boljoon Police Station sa pakighinabi sa Banat News selos ang motibo sa gibuhat sa suspek kay ang mismong asawa niini mikumpirmar nga seloso gyud ang iyang bana.

Ang biktima suod kaayong higala sa asawa sa suspek ug kanunay’ng tabangan ang biktima sa mga gimbuhaton ilabi na ang pagpanguha og dahon sa biyateles aron ilawog sa baboy sa tiguwang.

Niadtong tungura, gikatahong manguha unta og ilawog sa baboy ang biktima ug misampit sa silingang ginganlan og Melanie aron magpatabang og kuha og lawog, apan samtang nagpaabot ang biktima miabot ang suspek.

Ang suspek gikatahong misinghag kang Derama sa pag-ingon “Unsa man! Patyon tika?!, sige man ka’g pangutana ni Jelyn (asawa sa suspek)!”

Diha-diha gi-uppercut ni Mendez sa tuong gusok ug tiyan ang biktima hinungdan sa pagkalup-og niini ug misuka ug nawad-a’g panimuot.

Ang suspek human pagsukmag nangayo og tabang kang Melanie nga magkuha og init tubig aron ipainom kang Derama. Gikatahong samtang gisuwayan painom, nagpunay og yawyaw pagpangayo’g pasaylo ang suspek.

 Dangtan pila ka gutlo nananghid ang suspek nga may kuhaon apan hangtud ning pagsulat sa balita wala na mobalik sa ilaha.    (BANAT NEWS)