Labra, kaubanan may pasidungog sa PDEA, PRO7

CEBU, Philippines - Gipasidunggan na kagahapong adlawa sa Dangerous Drugs Board (DDB) ang mga sakop sa Cebu City Police Office nga maoy nakasikop kang Jamel Otto, usa ka Maranao trader nga nakuhaan sa P3 milyones nga shabu niadtong Agosto 25 ning tuiga.

Si DDB chairman Vicente “Tito” Sotto inubanan ni Police Regional Office (PRO-7) director Chief Supt. Lani-O Neres, personal nga midunol sa Chairman’s Medal of Merit Awards sa DDB ngadto nila kang Supt. Paul Labra II, Chief Insp. George Ylanan, PO3 Cesar Pandong, PO2 Roy Veloso, PO1 Frederick Ybañez, PO1 Albert Luardo nga pulos sakop sa Investigation and Detective Management Branch (IDMB) CCPO.

Ang paghatag og pasidungog gitambungan usab kini ni Sr. Supt. Patrocinio Comendador direktor sa kapulisan sa dakbayan sa Sugbu, ubang mga police opisyal sa rehiyon.

Ang maong medalya maoy labing taas nga pasidungog sa DDB ngadto na sa mga sakop sa kapulisan nga nakahimo’g dili masukod nga kampanya batok sa illegal nga drogas.

Si Sotto nagkanayon nga ang drug syndicates migamit na karon og guerilla tactics sa ilang drug operations aron di masayon og sikop.

Samtang si Neres ang mipasalig nga ang PRO-7 mosuporta gyud sa PDEA ingon man sa DDB sa agresibong kampanya sa illegal nga drogas labi na sa paggukod niadtong mga supplier niini nga gikan sa Mindanao.

Gihatagan usab og pasidungog sa PRO-7 og “Medalya ng Kagalingan” ug gipasaligan silang irekomendar og spot promotion tungod sa kalampusan. Si Sotto mipadayag nga hatagan usab niya’g laing award ang maong team sa ilang bag-o na usab nga kalampusan niini sa pagsikop niadtong milabay’ng gabii sa laing level 1 drug supplier nga si Jamal Salic kinsa nakuhaan usab og balor P1.2 milyones nga shabu. - Guam Logroño (BANAT NEWS)