Mga taga San Roque Talisay naglibog

CEBU, Philippines - Duha ka barangay sa dakbayan sa Talisay ang nag-ilog sa tulo ka sitio ug nahimo karong gubot tali sa barangay Tanke ug San Roque gumikan sa kalibog sa mga residente.

Si San Roque barangay kapitan Antonio Cabrera Jr., sa pakighinabi niini sa Banat News mibutyag nga ang sitio Salvador, San Rafael ug Kalinaw nga naila nang sakop sa barangay Tanke sakop diay sa iyang barangay.

Kini human nasuta dihang nagpahigayon sila og survey sa lugar ug nakita nga ang Municipal Boundary Monument nga ang mga sitio sakop pa sa San Roque.

Matud pa niini nga ang mga residente diha sa tulo ka sitio adto magbayad og tax sa Tanke ug ang mga residente usab nga mokuha og mga clearances ang maglibog ug madoble na ang gasto tungod kay sa duha ka barangay sila maglukatan og susamang mga dokumento.

Ang barangay San Roque dunay gilapdong 246 ka ektarya lakip na niini ang tulo ka ektaryang gilapdon sa sitio Salvador, Kalinaw ug San Rafael diin duna kini 17,000-18,000 ka mga panimalay.

Ang San Roque ang dunay P5.3 milyones nga abot matag tuig ug P4.9 milyones nga Internal Revenue Allotment (IRA).

Ang San Roque usa sa mga coastal sa barangay sa siyudad diin ang kasagarang panginabuhian mao ang pagpangisda, pagpanarbaho diha sa woodcraft factory.

Sa laing bahin, si city administrator Richel Bacaltos sa pakighinabi niini sa Banat News nagkanayon nga ang mga opisyal sa San Roque ang gipangayoan nila og position paper kabahin sa pangangkon niini ug iyaha pang susihon kung nakasumiti na ba.

Matud ni Bacaltos nga kung nakaduso na ang San Roque sa ilang position paper ang siyudad magtukod dayon og komitiba nga mopahigayon og imbestigasyon sa maong problema. - Brenda Batuto (BANAT NEWS)