PDAP ni Representative Ruiz ipakwenta

CEBU, Philippines - Misaway pipila ka mga barangay kapitan sa dakbayan sa Mandaue nga kaalyado ni Mayor Jonas Cortes ngadto ni 6th District Representative Nerissa Soon-Ruiz sa ubos kaayong kalidad nga gihatag nga serbisyo bisan pa man kun nagdawat kini og P1 billion nga gahin sa iyang Priority Development Assistance Program (PDAP) sulod sa 15 ka tuig nga paghupot sa katungdanan.

Matud pa sa maong reklamo sa mga kapitan nga ang PDAP niini wala gyod magamit ngadto sa gikinahanglang proyekto ug angay lamang nga mohatag kini og tukmang kuwentada ngadto sa mga tawo.

Apan ang executive staff ni Kongresista Soon-Ruiz nga si Atty. Zally Malig-on   mipadayag nga ilang ihatag ang tukmang kuwentada sa gipatuman nga proyekto sa kongresista sa matag tapos sa iyang termino.

Si Malig-on miingon nga kanunay masublian sa katungdanan si Kongresista Soon-Ruiz ug kini maoy buhing kamatuoran nga ang mga lumolupyo sa ikaunom nga distrito natagbaw sa gihatag niining serbisyo.

Nunot niini si Malig-on nanigurong mohatag sila og tukmang kuwentada sa mga proyekto sa kongresista sa higayon nga matapos na usab ang termino niini.

Si Kapitan Fiorello Latonio sa press statement mipadayag nga daghang kapitan sa dakbayan ang wala matagbaw sa serbisyo ni Soon-Ruiz.

Matud pa niya nga sagad sa mga proyekto sa kongresista mga sub-standards ug walay koordinasyon ngadto nilang mga barangay opisyal.

“My fellow barangay captains are not really satisfied with regards to her projects because if these are sub-standards and failed to coordinate with the city government and barangay captains,” nagkanayon si Latonio sa pamahayag.

Hinuon sagad sa mga barangay kapitan nga mireklamo mga kaalyado ni Mayor Cortes nga maoy gipanglantawang makaatbang sa kongresista sa pagkamayor sa dakbayan sa 2010. - BANAT NEWS