CEBU, Philippines - Hugot nga gisaway ni kanhi LTFRB-7 director Atty. Manuel Iway ang petisyong pagpa-umento sa laing P1 nga usbaw sa minimum nga pletihan sa pampublikong sakyanan.
Kini maoy iyang gipadayag atol sa public hearing kagahapon diha sa buhatan sa Land Transportation Franchising and Regulatory Board (LTFRB)-7 diin gitambongan sa drivers ug operators ug mga tinun-an.
Si Iway kinsa maoy nagrepresentar sa habig sa mga pasahero hugtanong misupak sa petisyon nga gisang-at sa CITRASCO aron usbawan og P1 ang minimum nga pletihan sa mga PUJ dinhi sa Sugbu.
Matud ni Iway nga premature pa ang maong petisyon nga gisang-at sa CITRASCO gumikan kay dunay mga higayon nga mo-rollback usa ang presyo sa lanang petrolyo.
Samtang si LTFRB-7 regional director Romulo Bernardez sa iyang bahin nagkanayon nga ang ilang ulohang buhatan mao nay modesisyon sa gisang-at nga petisyon kun paboran ba o dili ang petisyon nga gisang-at sa transport groups alang sa pagpasaka og laing P1 sa pletihan dinhi sa Sugbu.
Ang CITRASCO ug ang Confederation of Cebu Transport Operators and Drivers Incorporated (CCODI) maoy misang-at og petisyon ngadto sa LTFRB aron himuong P7.50 ang minimum nga pletihan sa mga pampublikong sakyanan dinhi sa Sugbu gikan sa P6.50 nga minimum nga pletihan.
Rason sa mga drayber ug operators mao ang padayong pagsaka sa presyo sa petrolyo, apan ang laing transport group nga Nagkahiusang Drayber sa Sugbu (NADSU) lahi og gipangayo ngadto sa LTFRB.
Ang Nadsu buot nga himuong parehas ang pletihan dinhi ngadto sa Manila tungod kay mas mahal ang presyo sa lana dinhi kumparar didto.
Matud ni Bernardez nga ang petisyon sa mga transport groups ug ang mga sentimiyento sa mga sumasakay iyang iduso ngadto sa LTFRB Central Office. - Rey Pasaporte (BANAT NEWS)