Raids vs bars, cybersex hingusgan sa CAIB

CEBU, Philippines - Molusad na usab og mga pagpangronda ang Cebu City Anti-Indecency Board (CAIB) sa nagkadaiyang mga balay kahilayan sa dakbayan sa mosunod nga mga adlaw.

Kini subay usab sa pagsaulog sa CAIB sa Anti-Indecency Month sa buwan sa Septiyembre nga nagdala sa tema nga “Clean and Descent City Starts With Me.”

Matud pa ni CAIB chairman Doctor Rene Josef Bullecer nga ubay-ubay na usab ang ilang nadawat nga mga reklamo may kalabutan ang pornograpiya.

Partikular na niini ang malaw-ay’ng mga pasundayag sa mga gay bars sa siyudad, lakip na ang cybersex sa mga internet café ug uban pa.

Gusto ni Bullecer nga mahatagan og pagtagad ang mga reklamo nga ilang nadawat tukma sa ilang pagsaulog sa Anti-Indecency Month.

“Amo nang gihangyo ang kapulisan inabagan sa different police force to augment sa among all-out-campaign niining buwana sa tanang klase sa indecency,” sumala ni Bullecer.

Midugang ang chairman sa CAIB nga gawas sa mga pagpangronda, ubay-ubay usab nga mga kalihukan ang nakalinya na alang niining buwana.

Lakip na niini ang pagpasiugda og mga forums ug ang pagbisita sa nagkadaiyang mga tunghaan sa sekondarya pag-edukar sa mga tinun-an kabahin sa Anti-Indecency Ordinance sa dakbayan.

Labing minos walo ka mga national high schools sa siyudad ang gitakdang duawon sa CAIB sugod sa adlaw’ng Lunes sunod semana alang sa maong katuyoan.

Kini naglakip sa Abellana National School, Pardo National High School, Lahug National High School, Camp Lapu-Lapu National High School ug uban pa.

“Ato sab ning himuon ang school to school campaign aron ma-aware ang mga tinun-an nga duna tay Anti-Indecency Ordinance ug unsa kakuyaw ang pornography ug unsay mahimo sab nila nga maoy naigo o hingtungdan aning problemaha,” sumala ni Bullecer. - BANAT NEWS