Kapitolyo nanghunaw sa Balili account

CEBU, Philippines - Nanghinaw ang mga opisyales sa Kapitolyo kalabot sa paggamit sa personal nga bank account ni Atty. Romeo Balili pagdeposito sa bayad sa kagamhanan sa lalawigan sa Sugbu sa P98 milyones sa 25 ka hektaryang lote sa pamilyang Balili sa Tinaan, Naga niadtong miaging tuig.

Sumala pa sa  tigpamaba sa Kapitolyo nga si Atty. Rory Jon Sepulveda sa interview sa DyRF nga walay labot si Governor Gwendolyn Garcia Ug nganong sa personal bank account ni Balili gideposito ang bayad ug dili ngadto sa Balili Estate.

Kini tungod kay ang maong tseke nag-agi pa kini sa pre-audit sa Provincial Auditors office ug Provincial Treasurer office sa wala pa hingpit nga mapirmahe ni Garcia.

Sa iyang bahin, si Provincial Treasurer Atty. Roy Salubre sa interview gihapon sa maong sibyaanan mitumbok nga naalinggatan niya ang maong isyu sa ilang pagpreparar sa voucher alang sa pag-release sa maong pundo.

Nasayran, nga si Salubre miingon nga si Balili miangkon sa imbestigasyon sa Kapitolyo nga wala dawata sa bangko ang maong tseke kay lahi ang account apan wala gibalik niini ang maong tseke sa ilang buhatan aron usbon ang pangalan sa payee ug gibalhin na lamang sa account sa naasoy nga property administrator sa Balili Estate.

Tungod niini, si Sepulveda nagkanayon nga may dakong tulubagon si Balili sa maong salaod kun wala kini nipahibawo ngadto sa korte nga nagtudlo kaniyang maoy administrator sa Balili Estate.

“Si Atty. Balili is appointed executor sa estate sa Balili. It will be a very....very serious offense if he violated the two oaths, the oath of a lawyer nga kinahangaln nga magtinarong ka, ang maong kliyente dili nimo ilaron ug oath isip executor sa Balili Estate,” sigon pa ni Sepulveda.

Samtang gipahibawo ni Atty. Sepulveda nga dili maalkansi ang Kapitolyo kun mahitabo nga ma-reverted gyud ang kinatibuk-an lote sa lungsod sa Naga nga napalit sa Kapitolyo. - BANAT NEWS