Pangilad sa Consolacion gibantayan

CEBU, Philippines - Gipahimangnoan sa kapolisan ang mga nagdumala og financial establishments ilabi na ang mga pawnshops nga magmatngon ug dili gilayon magpadala sa mga estorya sa wala hiilhing mga tawong magpakaaron-ingnong kabanay sa tag-iya tungod kay posibleng mga mangingilad kini.  Ang pahimangno sa kapolisan gipagawas human mailad ang Palawan Pawnshop sa barangay Cansaga sa lungsod sa Consolacion ug nakawatan og mokabat P100 mil nga kantidad sa mga alahas ug salapi.

Si SPO1 Romulo Sasing miingon nga ang cashier nga si Marilyn Batocan Manulat, 30, ug Canoto Ybarsabal, 28, nailad sa nagpailang pag-umangkon sa tag-iya. Nakuha sa maong lalaki ang P70,000 kantidad nga mga alahas ug salaping cash nga nagkantidad og P35,000.

Base sa imbestigasyon nga ilang gihimo sa kapolisan nga gipangulohan sa ilang hepe nga si Supt. Renato Malazarte nga gipatuo sa maong kawatan ang duha nga pag-umangkon sa tag-iya sa maong pawnshop.

Matud pa sa mga kawani nga nanawag pa sa telepono ang maong lalaki ngadto sa tag-iya sa pawnshop ug pagkahuman gisugo si Ybarsabal pagpalit og pagkaon sa usa ka fastfood nga nahimutang 30 metros gikan sa pawnshop. Samtang si Manulat gisugo pagpapalit og prutas sa merkado publiko sa mao gihapong lungsod.

Sa pagbalik pa sa duha wala na diha ang maong lalaki ug ang mga alahas nga nagkantidad og P70,000 ug salaping cash nga P35,000.

Si SPO1 Sasing miingon nga nagpadayon pa ang ilang pakisusi hangtod niining panahona alang sa pag-ila sa maong lalaki nga nag-ilad sa maong mga kawani. -Romeo Limpangog (BANAT NEWS)