Mas daghan ang gi-dengue sa Agosto

CEBU, Philippines - Mas daghan ang kinabuhing nakalas sa dakbayan sa Sugbu sa miaging buwan sa Agosto itandi sa nangaging mga buwan tungod sa sakit nga dengue base sa talaan sa City Epidemiology Surveillance and Statistics Unit (CESSU) sa Cebu City Health Department.

Matud sa assistant City Epidemiologist nga si Durenda Macasucol moabot sa napulo ang namatay sa siyudad niadtong Agosto tungod sa dengue gikan sa 299 nga nataptan sa nahisgutang sakit nga mao usab ang giingong labing daghan nga kaso nga natala sa CESSU niining tuiga.

Sumala ni Macasucol nga nagsugod ang pagsaka sa dengue cases sa siyudad niadtong buwan sa Hunyo nga dunay 106 ka kaso ug duha ang patay, samtang sa buwan sa Hulyo, ang CESSU naka-record usab og 186 ka dengue cases ug duha usab ka kinabuhi ang nakalas.

Nasayran nga niadtong miaging buwan sa Enero, ang CESSU nakatala lang og 108 ka kaso sa dengue dinhi sa siyudad ug tulo ang namatay.

Kini niubos sa buwan sa Pebrero diin ang CESSU nakatala lang og 66 ka kaso apan tulo gihapon ka kinabuhi ang nakalas.

Ang nahisgutang dengue cases niminos pa sa buwan sa Marso diin ang CESSU naka-record lang og 43 ka kaso ug walay namatay sa maong sakit.

Apan kini giingon ni Macasucol nga misaka og gamay sa buwan sa Abril dihang ang CESSU nakatala og 46 ka kaso ug duha ang namatay, miubos kini sa buwan sa Mayo diin 41 lang ka dengue cases ug dunay usa nga nakalas.

Nagkanayon si Macasucol nga posibleng mosaka pa ang mga kaso sa dengue sa siyudad niining buwana kung dili magpakabana ang mga Sugbuanon. - Elly Bolonos (BANAT NEWS)