Pagtugot ni Mayor Soc sa quarrying ipahunong

CEBU, Philippines - Buhatan sa Mines and Sciences Bureau, Region-7 ang miawhag kang Mayor Socrates Fernandez nga ipa-recall ang authorization nga iyang giisyu ngadto sa haulers og balas ug graba nga magkubkuban diha sa sapa sa Mananga.

Niadtong Hulyo 30, 2009 si Roger De Dios officer-in-charge (OIC) Regional Director sa nahisgutang ahensiya mipadangat og suwat ngadto sa mayor nga ipa-recall ang iyang authorization nga giisyu ngadto kang Ronnie Laburada ug ingon man hunongon na ni Fernandez ang iyang paghatag og authorization ngadto sa uban pang mga haulers.

Niadtong Hulyo 24, 2009 ang mga sakop sa Mines and Sciences Bureau ang misikop sa cargo truck ni Laburada nga gikargahan og mga balas ug graba gikan sa Mananga nga nagtangag sa plakang GJY-253.

Giingong gamiton kini pag-abuno sa mga sam-ang sa siyudad tungod kay si Laburada lisensiyadong contractor nga gikontrata sa siyudad sa pag-develop sa mga sam-ang.

Dihang gipangitaan og supporting transport document ang nahisgutang truck sa mga sakop sa MSB ang drayber sa maong truck nga si Victor Gualiza ang mipakita sa kopya sa suwat sa mayor nga naghatag og pagtugot kanila ug sa laing duha ka truck nga makahakot og balas ug graba.

Ang suwat sa mayor nga dunay petsang Abril 27, 2009 ang nagkanayon “To whom it may concern, I allow trucks GSY plate no. 253, GSW plate no. 892, GNT plate no. 725 to haul sand/ gravel to our river.

Niadtong Agosto 19, 2009 ang buhatan sa City Planning Development Coordinator (CPDC) mipadangat og suwat ngadto kang city administrator Richel Bacaltos kabahin sa nahisgutang suwat ni De Dios ngadto sa mayor.

Ang hepe sa CPDC nga si Christine Homez sa iyang suwat ngadto kang Bacaltos nagkanayon nga ang tanang matang sa mining ug quarrying gamay o daku nagkinahanglan og permit ubos sa “Philippine Mining Act of 1995” ug sa Revised Implementing Rules and Regulations niini.

Gipasabot ni Homez nga ang Local Government Units (LGU) ang responsable sa pag-isyu og permit sa tanang gagmay’ng mining ug quarry operation ubos sa Provincial ug City Mining Regulatory Board.

Sa pagkakaron ang dakbayan sa Talisay walay awtoridad nga mohatag og permit ngadto sa mga manghakot og balas diha sa sapa sa Mananga tungod kay wala sila’y Mining Regulatory Board.

Sa laing bahin, si Bacaltos nga nahinabi sa Banat News kagahapon nagkanayon nga si Laburada ang mi-apply og hauling permit ug nagproseso pa kini ug wala pa mahuman ang “gratuitous permit” niini maong temporaryong mihatag ang mayor og authorization letter aron matrabaho ang gikontrata niining proyekto. – BANAT NEWS