CEBU, Philippines - Usa ka 26-anyos nga lalaking kaslonon ang gikatahong naghikog tungod sa kahiubos nga di makagasto og bonggang kasal ang iyang mga ginikanan alang sa iyang kaminyuon.
Ang kaslunong lalaki nga gituohang naghikog sa miaging hapon pinaagi sa paghigot og pisi nga nylon sa iyang liog giilang si Leo Monreal Yepes.
Si Yepes napalgan na lamang nagbitay sulod sa lawak sa ilang panimalay sa sitio Eva sa Tungdan, Basak, dakbayan sa Lapulapu.
Sumala pa nila ni SPO2 Rolito Jumao-as ug SPO1 Frederick Islet sa Homicide Section kagahapon sa pakighinabi sa Banat News nagbilin og suicide note ug mipadayag sa iyang kahiubos sa mga ginikanan nga gikatahong mibalibad sa bongga o engrandeng hikay sa iyang kasal.
Ang ginikanan nga gipakita nila ni SPO1 Islet sa maong suicide note miangkon nga ang sinuwatan sa maong suicide note sinuwatan gyud sa ilang anak.
Sumala pa sa kapolisan gikatakda untang magpakasal sa simbahan uban sa iyang hinigugmang babaye si Yepes karong bulana. - BANAT NEWS